Billigare enn du trur å kjøla huset med varmepumpe
– Når det er så varmt som no er det dumt å ikkje nytta kjølefunksjonen for det den er verd, seier marknadssjef Per Berge.
Det har vore svært høge temperaturar på Voss og i landet for øvrig i det siste, og no i helga er det meldt tett opp mot 30 grader på Vangen!
I det høvet vil Voss Energi minna om at det er billigare enn ein skulle tru å bruka kjølefunksjonen til varmepumpa for å få ned innetemperaturen:
– Når ein fyrst har pumpa installert heime, og gradestokken byrjar å nærma seg 30 grader, så er det dumt å ikkje nytta kjølefunksjonen for det den er verd. Nokon trur kanskje at dette kostar mykje, men det trekkjer ikkje mykje straum. Det kostar mykje meir å varma opp om vinteren enn det gjer å kjøla ned no sommarstid. Men hugs å lata att vindaugo og dører når du kjøler, slik at du ikkje kjølar for "kråka", seier marknadssjef hjå Voss Energi, Per Berge.
Nokre få hundre watt
I gjennomsnitt brukar ei varmepumpe berre nokre få hundre watt i døgnet, ifølge denne artikkelen frå Varmepumpeforeningen. Dei reknar ein gjennomsnittspris på under 6 kroner dagen for bruk av varmepumpe til nedkjøling, med oppdaterte 2023-prisar. Desse tala kjem sjølvsagt an på ulike faktorar, som temperatur, størrelse på rom og varmepumpetype.
Ikkje kjøl for hardt!
Selv om det er fint å bruka varmepumpa til kjøling, er det og verd å minna om at det ikkje er lurt å kjøla for aggressivt:
– Viss ein køyrer på hardt med kjølinga brukar sjølvsagt varmepumpa meir straum. I tillegg er det ikkje godt for helsa, eg har opplevd det sjølv fleire gongar, å verta sjuk og forkjøla når air condition skapar stor temperaturforskjell inne og ute, fortel Per Berge.
På Varmepumpeforeningen si informasjonsside finn du fleire gode artiklar med tips og triks om varmepumper.