Ein musikalsk møteplass
Frå tradisjonelle hardingfeletonar til moderne klubbmusikk, internasjonale artistar og musikalske opplevingar for heile familien.
22.–25. oktober er det igjen klart for Osafestivalen på Voss, og me i Voss Energi er stolte av å støtta ein festival som både tek vare på kulturarven vår og gjev rom for nyskaping.
Skrevet av: Marte RamsøyPublisert: 23. oktober 2023
Open og inkluderande
Osafestivalen har gjennom mange år vore ein viktig møteplass for musikarar, musikkelskarar og nysgjerrige publikummarar. Med røter i den norske folkemusikken og inspirasjon frå Sigbjørn Bernhoft Osa sine visjonar, er festivalen ein arena der tradisjon møter nye uttrykk og musikalske grenser vert utfordra.
– Me er opptekne av å fremja folkemusikken som ein levande sjanger, med rom for eksperimentering og sjangerblanding. På mange måtar er festivalen ein musikalsk møteplass, der folkemusikken møter og får bryna seg på andre sjangrar og musikkformer, inspirert av Sigbjørn Bernhoft Osa sine visjonar for ein open og inkluderande folkemusikk, fortel Ida Dyrkorn Heierland, festivalsjef for Osafestivalen.
Og årets program viser nettopp kor mangfaldig folkemusikken kan vera!
-
Festivalsjef Ida Dyrkorn Heierland. Foto: Sverre Hjørnevik/Mediesmio
Frå hardingfele til klubbmusikk
Årets Osafestival byr på eit imponerande spenn av musikalske opplevingar. Her finn ein både etablerte namn, unge talent og artistar som tek tradisjonsmusikken i heilt nye retningar.
Fredag 23. oktober kan publikum mellom anna oppleva Ola Kvernberg & TrondheimSolistene, som er kjende for sitt leikne og kreative samspel. Same kveld står både Knut Buen & Alexander Aga Røynstrand, Elias Akselsen og trioen ULD på programmet.
For dei som likar litt ekstra trøkk, vert det òg mogleg å oppleva Folksomt og DJ Sissyfus, som tek folkemusikken med seg ut på dansegolvet.
Laurdag held festen fram med mellom andre Real Ones, Selma French, Gabba og Frøkedal og Powerfolk-Familien. Publikum kan òg gle seg til tingingskonserten «Slåttonn!» med Geir Sundstøl og Erland Dahlen.
Og kva med lyden av sekkepiper midt på Voss? Kirkwall City Pipe Band frå Orknøyane kjem til festivalen og skal fylla Voss idrettshall med mektige tonar frå sekkepiper og trommer.
Her vert det med andre ord noko for dei fleste musikksmakar!
Musikalske opplevingar for alle aldrar
Ein treng slett ikkje vera folkemusikkekspert for å ha glede av Osafestivalen.
– Det er viktig å få fram at me har eit program for alle – ein treng ikkje vera «folkemusikk-nerd» for å ha det kjekt på Osafestivalen! Gjennom variert program satsar me på å nå både unge og eldre, røynde og nybyrjarar, seier Heierland.
Også i år er det lagt opp til ei rekkje aktivitetar der publikum kan oppleva musikken på ulike måtar.
Laurdag kan ein mellom anna vera med på Osavandring gjennom gamle Vangen, der lokalhistorie og kultur står i sentrum. Festivalen byr òg på Osaseminaret, konsertar og musikalske møte mellom ulike tradisjonar.
Gjennom UngOsa får born og ungdom frå 7 til 18 år høve til å fordjupa seg i spel, song og dans. Helga vert avslutta med ein eigen familiekonsert der deltakarane får visa fram noko av det dei har arbeidd med.
Slik bidreg festivalen til at nye generasjonar får oppleva, utforska og vidareføra den rike folkemusikkarven vår.
Lokal kulturarv møter verda
Eit av dei særlege høgdepunkta i årets program er lanseringskonserten til Berit Opheim sitt prosjekt «Vossasongar – vokal folkemusikk frå Vossabygdene».
Gjennom eit omfattande dokumentasjonsarbeid har Opheim samla heile 575 folketonar frå Voss. Laurdag 24. oktober vert eit utval av desse presenterte i Nain. Dette vert ei heilt spesiell oppleving for alle som er glade i lokal kulturhistorie og tradisjonsmusikk.
Sundag vert det òg eit musikalsk møte med lokal kulturhistorie gjennom «Felemakaren – ei konsertframsyning». Her tek skodespelar Morten Svartveit og spelemann Alexander Aga Røynstrand publikum med inn i historia om vossingen og felemakaren Sigvald Rørlien.
Samtidig vender festivalen blikket utover. Med artistar frå mellom anna Norden, Storbritannia og Bulgaria vert Voss ein møteplass for musikktradisjonar frå fleire delar av verda.
God støtte lokalt
Osafestivalen er meir enn berre konsertar og musikalske opplevingar. Festivalen er òg eit resultat av stor dugnadsinnsats, engasjement og eit godt samarbeid mellom frivillige, arrangørar og lokale støttespelarar.
– Me er heilt avhengige av støtte for å stella i stand festivalen år etter år. Me er veldig glade for at me har så mange fantastiske frivillige, og me set stor pris på alle dei lokale bedriftane som er med å støtta kultur generelt og folkemusikken og Osafestivalen spesielt, seier Heierland.
For Voss Energi handlar sponsing om meir enn å støtta enkeltarrangement. Det handlar om å bidra til ei levande bygd, der både små og store får oppleva kultur, fellesskap og aktivitetar gjennom heile året.
– Det er viktig at me har variasjon i kulturlivet lokalt, og Osafestivalen er ein viktig aktør innan både folkemusikk, klassisk- og samtidsmusikk. Det er flott at dei greier å løfta fram koplingane mellom desse musikkformane og samstundes inspirera nye generasjonar til å halda tradisjonsmusikken og -instrumenta i hevd, seier Per Berge, dagleg leiar hjå Voss Energi Kraft.
(Foto: Hanna Moberg Rosland/Avisa Hordaland)
Gratisbillettar til Voss Energi-kundar!
Er du straumkunde hjå Voss Energi og har lyst til å oppleva Osafestivalen? Då bør du følgja ekstra godt med på mobilen i dagane framover!
Me gjentek nemleg suksessen frå tidlegare år og deler ut gratis konsertbillettar til heldige kundar.
– Me gjentek suksessen frå i fjor med å dela ut nokre gratisbillettar til kundane våre i førekant av festivalen. Følg med på SMS i dagane før festivalen – me sender ut tilbod om å vera med i trekninga til alle kundar med telefonnummer registrert hjå oss, seier Berge.
NB!: SMS'en er sendt ut og trekkninga er i gong! Send e-post til energi@vossenergi.no om du ynskjer å vera med i trekkninga. PÅMELDINGA AVSLUTTAST 19.OKTOBER 13:00!
Me i Voss Energi er stolte av å vera med på laget og bidra til at Osafestivalen kan halda fram med å skapa musikalske møteplassar på Voss.
Me gler oss til ei helg full av musikk, tradisjonar, nye impulsar og gode opplevingar!
Osafestivalen 2026 vert arrangert 22.–25. oktober på Voss.
Sjå heile programmet på www.osafestivalen.no.